中環出更：金刀梁獲殊榮 喜有齒理
送舊迎新，城中名醫前晚除夕夜輪流開Party倒數，香港大學校務委員會主席梁智鴻（金刀梁）率先收到新年大禮，獲香港牙醫學會頒發「榮譽會員」資格，係該會六十二年來，首位非牙醫獲得呢個殊榮。做咗「榮譽會員」有乜好處？金刀梁笑言，以後可以幫人剝埋牙，認真搞鬼。
金刀梁天生一棚靚牙，但今次獲獎，同「牙力」無關。牙醫學會會長梁世民盛讚金刀梁在任行政會議期間，不遺餘力推動老人牙科服務，認真抵讚。金刀梁話，雖然佢唔係牙醫，但堅信人生冇口腔健康，唔算係真正健康，好希望人人有棚健康牙齒。
梁卓偉無官一身輕
金刀梁喺官場老友多，前晚獲頒殊榮，好友紛到賀，好似食物及衞生局局長高永文就算失聲都去支持，認真唔話得。卓妮見高局長猛指住喉嚨，有口難言，以為佢大感冒，原來係近日經常飲凍飲之過，高太無奈嘆道：「佢最鍾意喺飲品度加冰，叫佢唔好又唔理，所以咪咁囉！」幸好高局長即時食喉糖醫自己，希望佢早日康復啦。
同場仲有前特首辦主任梁卓偉（Gabriel），佢依家喺港大社會醫學系做系主任，見佢開心戴上Party帽，真正無官一身輕。Gabriel話，依家又要教書，又要做行政，忙到冇時停，但教學生係佢最大興趣，好享受喎。
卓妮