政情：公民講場：元旦上街 無所色從

每年元旦日都係平平淡淡咁過，不過今年元旦將會特別熱鬧，因為七個民間團體不約而同喺同一日發起遊行同集會，仲叫支持者響應呼籲，着番相應顏色嘅衫。要求特首梁振英（CY）落台嘅民間人權陣線呼籲市民着黑色衫反CY，而撐CY嘅愛港之聲就叫人着白色衫打對台。如果大家聽日唔去遊行，咁除咗避免着黑、白呢兩隻顏色嘅衫外，仲要記得千祈唔好着綠色、黃色或紅色衫，事關綠色代表白鴿黨、黃色代表人民力量、紅色又會畀人聯想起社民連，着彩虹嘅顏色又話支持同性戀。今時今日着咩顏色嘅衫都會畀人對號入座，睇嚟大家聽日打開衣櫃都會幾頭痛。