政情：發叔入院兩周惹揣測
天氣忽冷忽熱加上進入咗流感高峰期，七十六歲嘅鄉議局主席劉皇發都「打敗仗」，兩個多星期前患上感冒，仲入埋醫院。發叔身體一向壯健，今次一病兩個幾星期，期間兩次「告假」出院。咁耐唔見佢，引起唔少聯想以為佢身體出大問題。
留院中嘅發叔，據聞已無大礙，只係感冒一直未清，為穩陣起見，繼續住院休養。今次中招，聽聞係兩、三星期前出席大澳一個活動冷親。十七日發展事務委員會會議，即係討論特首梁振英僭建但最終流會嗰次，身為主席嘅發叔因病告假，兩日後人大選舉投票，發叔向院方告假出院，戴口罩出席。
幾日後嘅平安夜，已經好番好多嘅發叔再次請假出院，與屯門區內人士聚餐，大家有講有笑，估唔到席間有人感冒，口水花四濺，發叔因為感冒未清，再次中招入院，於是反反覆覆，簡簡單單嘅感冒，就搞足佢兩星期。早前鄉議局為新大樓到各區籌款，都唔見發叔身影。希望發叔好好休養，盡快再戰江湖！