政情：論壇鬥惡鬥大聲
《城市論壇》嘅氣氛一向都以火辣見稱，上星期喺唇槍舌劍之間加插埋肢體衝突，所以尋日節目保安相應增加，仲喺場中間以鐵馬劃出一條楚河漢界，以一條約一米闊嘅通道相隔支持同反對特首梁振英（CY）嘅觀眾，愛港之聲召集人高達斌唔知係咪見到兩陣人數感到意外，話懷疑對家民陣畀錢請人嚟撐場，激到民陣副召集人陳倩瑩反駁話，民陣先冇咁多錢請五十萬人上街。
譚香文都唔畀入場
尋日出席嘅市民真係較平時多，有市民攞咗籌後，因為人太多未能入場，只能喺場外圍觀。不過，去到節目中段時，忽然有一把女聲喺度大叫不斷投訴：「佢哋唔畀我入！」原來係黃大仙區議員譚香文（Mandy）。Mandy話自己攞咗籌但無得入場，喺場外叫咗一排都冇人理，意氣難下於是打電話畀場內朋友求救，結果由朋友轉達主持先准佢入場。Mandy一入場就同主持投訴入場遭拒，仲話要攞籌排隊入場係「打壓言論自由」喎，睇嚟《城市論壇》雖加強保安，但論壇規矩依然無變，就係靠大聲就得！
