政情：港台倒新舊老闆米梁朝貪曾(火羅)獎
今年政壇話題人物、金句一籮籮，娛樂性媲美娛樂圈。香港電台尋日就公布年度風雲人物、金句甚至潮物嘅選舉結果，但港台作為官媒，竟公然喺元旦「倒梁」遊行前夕幫老闆倒米，選出以特首梁振英（CY）為首嘅班底成員為年度風雲「(火羅)」人，向民望再見低谷嘅CY踩多兩腳！
港台公布《晨光第一線二○一二風雲人物大選》投票結果，教育局局長吳克儉及前發展局局長麥齊光等人合組嘅「一眾領嘢梁班子成員」名單，出選年度風雲「(火羅)」人第一名，以爛騷「關注香港未來」上位嘅亞洲電視管理層，同貪盡海陸空嘅前特首曾蔭權爵士分別位列二、三名。港台向來被親中人士批評為事事同政府對着幹，猶如獨立王國，今鋪更揀正喺元旦日「倒梁」遊行前公布結果，政府真係多得佢哋唔少！
王國興金句獲欣賞
喺特首選舉落敗嘅唐英年，佢一句「你——呃——人！」高票當選年度金句，但負責頒獎嘅港台節目主持鄭子誠，反而最欣賞立法會議員王國興嘅「日以繼夜、夜以繼日」金句，大讚佢講得出呢句說話好有承擔，身旁嘅主持更笑言，如果王萬一唔做議員，可以轉行做廿四小時便利店，打正旗號「日以繼夜」添！