政情：謝偉俊食碗面反碗底？
今屆立法會唯一一個由功能組別轉戰直選成功、被戲稱「西環契仔」嘅議員謝偉俊（Paul），早已有傳佢係靠中聯辦背後「發功」，極力配票先至成功「空降」九龍東。尋日佢接受一個電視台訪問時，坦然承認當時中聯辦有幫佢拉過票，但澄清自己係「香港仔」唔係「西環契仔」，仲叫中聯辦官員唔好太多露面，以免被港人認為香港內地化。「得人因果」理應「千年記」，之但係Paul唔單止冇記住，得人恩惠後竟然又叫人唔好太多露面，唔通佢無睇過吳楚帆主演嗰齣粵語片《香港屋簷下》，無聽過「食碗面反碗底」呢句金句？
Paul近期同中聯辦關係頗為密切，今屆立法會選舉中，佢由旅遊界轉戰九龍東直選，最後Paul獲唔少地區樁腳支持下，以三萬八千五百幾票成功當選，話佢獲得中聯辦配票支持呢個講法，已經係街知巷聞了。
話接受唔到投票機器
尋日Paul親口證實，中聯辦於選舉中確係有幫過佢，譬如話介紹佢識一啲重要嘅人、社團咁，但佢解釋呢啲幫助或賞識，係建基於佢完全獨立嘅身份喎，咁講直情係「打完齋唔要和尚」啦。佢仲話，如果要佢投降晒，將佢所有嘅嘢好似投票機器咁（投票），佢唔能夠接受。佢又指中聯辦喺選舉期間只係利用其網絡，向外宣示Paul唔係敵人。
Paul又主動批評中聯辦，話佢哋唔適宜太多出現喺公眾面前，「好似黃大仙區某條邨嘅一啲活動，都搵個中聯辦官員坐喺度做主禮，而且主禮位置仲要喺香港官員之上嘅，呢種感覺整整吓好似香港似足晒內地嗰套，有個政府又有個書記咁，相信香港人會覺得唔係幾舒服。」
白鴿去廉署投訴舞弊
佢話，特首梁振英嘅誠信問題已經觸及民怨爆發點，擔心政府弱勢會影響港人治港。佢又話香港政治應該擺脫「非親中、就係反中」嘅二分法，期望有更多中間派為香港發聲。佢咁講法，無非都係想為自己親中形象洗底，走向中間派啫！
Paul對港人治港嘅思路確係清晰，中聯辦當日出面幫佢，佢就應該唔好領情，應該斬釘截鐵咁拒絕啦。就謝偉俊的言論，民主黨懷疑中聯辦觸犯選舉舞弊及非法行為條例，今日會去廉政總署投訴。