中環出更：何超瓊 俞琤中環蜜蜜傾
賭王二房長女何超瓊（Pansy）被本報獨家揭發與密友俞琤漫遊巴黎至今，唔經唔覺將近一年，二人一直都採取「寧畀人知，莫畀人見」嘅態度，前後腳低調約會，甚少見佢哋一齊出動。不過日前我哋就見到佢哋肩並肩高調現身鬧市中，毫無避忌咁咬耳仔，沿途引起唔少途人注目，但佢哋一於好少理，唔通佢哋打算逐步將密友關係明朗化？
上周五下晝約四點，Pansy同俞琤呢對「難得知己」乘坐私人座駕，雙雙抵達中環雪廠街，佢哋落車後步入太子大廈，邊行邊交頭接耳，最後二人嘅腳步停留於一間名店外。當時Pansy對眼望向櫥窗內貨品，但佢好明顯冇心shopping，繼續同身邊嘅俞琤密密斟。
好友走先 Pansy落寞
雞啄唔斷都終要講拜拜，俞琤似有要事在身，先行離開，留低Pansy繼續喺度睇嘢。冇咗密友喺身邊嘅佢，神情變得落寞，不時拎手機出嚟望，似係等緊一啲消息。可惜等咗二十分鐘仍無動靜，Pansy只好返回雪廠街登上座駕離開。
卓妮