政情：李宗德拍片向妻示愛
今個月係和富社會企業會長李宗德（Joseph）結婚四十周年紀念，尋日佢喺一間以佢個名命名嘅全人發展教育中心命名典禮上致辭時，話特別多謝太太一直都咁支持佢。結婚四十周年又叫做「紅寶石婚」，但Joseph就紅寶石欠奉，但話「首飾年年都送」，而今年就搞新意思，親手拍短片向太太示愛。
我哋問Joseph點同太太慶祝，佢就話紀念日之前同朋友搞咗派對，但費事人哋送禮，所以冇提到係結婚紀念，而正日嗰日就同太太、仔女及孫，三代同堂食餐飯，佢仲喺嗰日親自拍短片向太太示愛添。至於Joseph喺短片中如何表達愛意，佢就懶神秘唔肯講。
林鄭同尤曾家麗撞「英名」
尋日個命名禮上，真係撞都冇咁啱，除咗主禮嘅政務司司長林鄭月娥嘅英文名叫Carrie外，同場嘅民政事務局前常任秘書長尤曾家麗都係叫Carrie，但兩人就好似冇乜點交流喇。