多個諮詢委員會同法定機構嘅委員任期仲有幾日就結束，政府尋日一口氣公布多項任命去舊迎新，當中包括多名「梁粉」，例如即將卸任港區人大代表嘅科技大學副校長（行政）黃玉山，接替做咗問責局長嘅張炳良出任消費者委員會主席、前天文台台長林超英做咗環境及自然保育基金委員會，以及環境保護運動委員會主席、高票連任港區人大嘅雷添良就做教育統籌委員會委員、行政會議成員張志剛做咗廉政公署事宜投訴委員會委員等。
不過，特首梁振英（CY）都唔係只識委任自己友出任公職，多名「唐營」人士亦有份，例如廠商會會長施榮懷獲委做禁毒常務委員會委員、工總立法會議員梁君彥做咗廉署貪污問題諮詢委員會委員等。其中獨立監察警方處理投訴委員會就最誇張，三位副主席都喺特首選舉中提名唐英年嘅，包括廠商會議員林大輝、地產及建造界議員石禮謙同保險界議員陳健波。
除咗梁營同唐營，CY都無忘記泛民主派嘅「何營」，其中民主黨前副主席狄志遠（Dick）更加連中三元，同日獲委任為廉署審查貪污舉報諮詢委員會、禁毒常委會及保護證人覆核委員會小組委員。阿Dick喺國教風波中力撐政府，差啲畀民主黨開除黨籍，今次算係小小補償喇！