政情：張學明為新大樓撲水
鄉議局九龍塘舊址至今仍未賣出，但沙田石門新大樓嘅營運同工程費就借落一筆街數未找，搞到最近頻頻收律師信追債，所以主席劉皇發早前就計劃喺呢個聖誕假落鄉撲水。不過，過去兩日只見到副主席張學明落元朗六鄉及屯門鄉等地籌錢，未見發叔蹤影，有傳發叔自上星期因為感冒入院而缺席立法會發展事務委員會後，雖然曾出院回家休養，但近日又傳佢再度入院，而且聲線沙啞，病情認真撲朔迷離。
澄清特赦論 冇同政府打龍通
雖然發叔冇親身落鄉參加籌款會議，但各村代表及鄉事委員會主席都達成共識，決定捐出村代表每季二千元嘅津貼幫補吓鄉議局，局方又計劃於明年四月及六月舉行兩場演唱會籌款。大家難得聚首一堂，梗係要討論吓就快截止登記嘅新界村屋僭建申報計劃啦。前日話政府或會特赦四至六層村屋僭建嘅張學明，尋日落鄉籌款時，再度呼籲村代表促村民登記僭建，保證僭建物喺申報後五年內唔會清拆，因為呢個係政府對村民嘅承諾。
身兼行政會議成員嘅張學明澄清，冇同政府打龍通，政府點處理係政府嘅責任。不過，點處理好似連環船咁嘅僭建村屋係技術性問題，鄉議局會尋求法律意見，為村民申訴同求情喎。