政情：劉江華新官交足貨
原民建聯副主席劉江華上任政制及內地事務局副局長唔夠一星期，已為政府同建制派立下奇功！點解？事關三個泛民黨派民主黨、社民連同人民力量，都有意角逐因劉江華辭職而出缺嘅沙田區議會田心選區議席，並會喺今日舉行協調會議講數。不過，三大黨派會前都繼續各持己見、寸步不讓，估計最後都係白開會，隨時又會將個議席拱手相讓畀建制派，並進一步加劇泛民分裂。政府每月支十八萬零三千元人工畀劉江華，真係唔係白畀o架！
前田心區議員公民力量潘國山，喺去年區議會選舉臨截止報名前一刻，以寫博士論文為由退選，讓路畀有意角逐立法會超級議席嘅劉江華參選，本身已有欺騙選民之嫌。依家劉江華為咗高薪厚祿而辭任區議員，潘國山又咁啱得咁蹺寫完論文，復出參選，都唔知當選民係乜。各方都估計潘國山會喺補選中大跌票，因而吸引到多個泛民黨派出戰，希望趁呢個千載難逢嘅機會，「光復」被建制派雄踞多年嘅田心區。
長毛妥協倡抽籤選人
其中新任民主黨主席劉慧卿（卿姐）嘅愛將丁士元，早喺劉江華任命正式公布前，已喺區內瘋狂插旗宣傳。民主黨提出，喺剛結束嘅立法會選舉中，卿姐喺田心選區嘅得票係眾多泛民候選人之冠，加上卿姐喺該區設有地區辦事處，丁士元又有幫開佢做地區工作，自然應該由佢哋出選。
不過，社民連批評民主黨早已棄守田心多年，眼白白睇住潘國山喺○七年自動當選，到去年亦冇派人挑戰劉江華，冇理由到依家一有機會贏，就生人霸死地話呢個區係佢哋嘅。再者社民連計劃派出黨主席梁國雄（長毛）嘅愛將姜靈彰出選，長毛喺田心區嘅得票只係僅次卿姐，以成個大選區計更係新東票王，點計都冇理由讓路。不過，長毛亦明白泛民相爭，最後只會令建制得利，最近就讓步，建議透過抽籤決定由邊個黨派人出選。
人力講明不讓路白鴿
人民力量原定派出佢哋嘅「女神」袁彌明（Erica）出戰，但Erica最近打咗退堂鼓，依家仲未定到人選。不過，無論派乜人都好，人力都講明唔會同民主黨協調，就算抽籤亦只會同長毛抽，唔會同被佢哋指為「投共」嘅民主黨抽。如果人力唔肯讓路，社民連亦冇理由唔選，最後又會好似早前嘅沙田鞍泰選區補選咁，一個建制派對三個泛民，潘國山想唔贏都幾難！