中環出更：IT廚神黎志安 研發教煮餸App
從事資訊科技嘅IT人，通常予人好悶感覺，但自從任職跨國IT公司高級諮詢顧問嘅黎志安（Ricky）喺電視節目贏得廚神稱號後，不得不令人對IT人改觀。早前一個周末下午，Ricky特登帶埋自家製造嘅法國焦糖燉蛋、檸檬方塊等甜品，去探相識十幾年嘅老友，四人一邊歎美食一邊傾合作大計，好愜意。
Ricky個樣好後生，睇唔出鑽研美食已逾三十年。佢八歲已入廚房學煮嘢，後來為咗有一技之長傍身以便移民後搵食，遂正式學廚取得證書。雖然最終冇揸鑊鏟搵食，但天生愛煮嘢食嘅Ricky做IT人之後，就鍾意匿埋廚房鑽研創新菜式當減壓，結果精通中、日、歐及東南亞菜式，就算整甜品及麵包都難唔倒佢。
原來Ricky正同老友、越世代創新媒體集團董事總經理馬維業（Rex）夫婦密斟將飲食文化及Life Style數碼化，開發創新互動App教人煮餸。Ricky太太Cammy好期待，因佢成日要幫Ricky做食材買手，若有App在手，所有材料一目了然，夠晒方便。