中環出更：愛駒小母牛連捷 杜振源善心爆發
積善之家，必有餘慶，真係冇講錯。身兼國際小母牛香港分會籌款委員會主席嘅「快勞夾大王」杜振源（Simon），佢太太曹麗明、囡囡杜泳璇（Athena）及囝囝杜擴業（Michael）名下嘅愛駒「小母牛」早前連贏兩場頭馬，Simon於是喺沙田馬會會所擺下祝捷會。Simon嘅老友齊去沾喜氣，好似啱啱當選港區全國人大代表嘅南旋集團主席王庭聰、佳能香港高層鄧慶治等。
身兼國際小母牛香港分會籌委會副主席嘅王庭聰一到場，老友們就恭喜聲不斷，佢話好開心終於有機會謝票。今年唔少福建人躋身政壇，包括早前獲委任教育局政治助理嘅施俊輝，依家輪到王庭聰躋身人大，香港百萬福建人值得飲杯慶祝。唔怪得當晚王庭聰情緒好高漲，上台高歌《愛拼才會贏》，唱出拚搏拉票終於得償所願嘅心情。
捐40萬元畀小母牛同慶
Simon無時無刻掛住小母牛，愛駒「小母牛」早前連贏兩場頭馬，佢即時宣布捐出四十多萬元畀慈善機構小母牛，老友們都拍爛手掌。
好友陳百祥（阿叻）早前屋企被爆竊，損失包括名牌手袋在內嘅財物，Simon好有心，靜雞雞買個新簇簇嘅名牌手袋送畀阿叻，阿叻喜出望外，話世界上除咗老婆黃杏秀之外，對佢最好嘅就係Simon喎！
當晚Simon嘅掌上明珠Athena都有到場，她重返校園修讀心理學，話希望充實吓自己，非常好學。而一同到場的仲有Michael及太太Vivian，Vivian話佢奉行每星期食一次「環保海鮮」，即係捕殺過程冇咁殘忍嘅海產，被殘忍餵養嘅鵝肝都唔食，心地咁好，人都靚啲！
卓妮