尖沙咀景點 旅巴通街泊
「近年政府致力推動旅遊產業，旨在帶動本港經濟，可惜配套與設施俱未與時並進，隨時「轉機為危」！尖沙咀區為訪港旅客觀光及購物熱點，每日人流不絕，惟旅遊巴泊位卻嚴重不足，旅巴司機直指「周街泊」情況普遍，不但影響交通秩序，更會威脅行人安全，令本港國際都會形象受損。立法會議員及區議員均狠斥運輸署規劃失當，促政府正視問題。
「冇位都要搵位泊，如果唔係實畀啲客詐型！」全職旅遊巴司機羅先生經常接載旅客到尖沙咀區購物，因泊位不足而需不斷「兜圈」甚至違泊，「泊街都係博一博，都唔可以離開部車o架，一個唔小心食牛肉乾咁成日就白做！食飯都要喺車度食，人有三急都係搵個空樽解決咋！」羅指即使有少量半小時咪錶位，但因時間太短，「連食個飯盒都趕唔切」，要求當局正視。
旅巴泊位不足害苦司機，亦引起交通混亂。郭先生指尖沙咀區常有旅巴阻擋巴士埋站，乘客往往需以身犯險，「條馬路三線行車，有次兩條線都被大巴霸咗，搞到我哋要行出最出面條線上車，爭啲畀車撞！」
「梳士巴利道同漆咸道南一帶尤其係重災區，日日都有旅遊巴亂泊！」油尖旺區議員關秀玲直指問題存在已久，當局卻一直未有正視，「有長者同我投訴，話條路畀旅巴阻住，上落巴士都好牙煙！」關認為警方除加強檢控違泊車輛外，長遠必須由規劃入手解決，「除咗唧牙膏式加泊位，係咪可以研究下改建區內使用率唔高嘅設施？」
80泊位不敷應用
運輸署發言人表示，尖沙咀區現有約八十個旅遊巴泊位，路旁咪錶泊位及室內泊車位各約佔一半，路旁咪錶泊位以半小時類別為主，認為可應付旅遊巴士泊車需要。發言人又強調，政府一直有監察尖沙咀區內旅遊巴士泊位情況，並會因應需求在區內尋找安全及不妨礙交通的位置加設泊位。由去年年初至今年八月，該署已在區內增設九個路旁旅遊巴士泊車位，並正研究再增設泊位的可能性。
「遊客上落車唔方便，路面又一塌糊塗，簡直破壞晒國際都會嘅形象！」立法會交通事務委員會委員王國興指出，事件反映政府交通規劃疏忽，令旅客、市民以至旅巴司機三方面均受其害。為免交通秩序「爆煲」，認為運輸署應對尖沙咀交通配套進行全面檢討，並建議當局考慮向下發展，興建地底停車場以應付需求。
記者：朱廣華