又到聖誕，又到聖誕，又到聖誕今晚要歎……普天同慶嘅聖誕佳節歎乜好呢？如果閣下趁住天寒地凍想去歎一歎肥牛火鍋，功夫茶會以非常羨慕嘅眼光直豎拇指讚嘆一句：閣下好富貴啊！
係呀，今時今日識得歎又歎得起肥牛火鍋真係一種富貴行為，事關牛肉價格不斷飆升，升到阿媽都唔認得嗰隻。內地供港活牛獨家代理五豐行幾日前宣布，良種牛批發價每擔調高二百六十元至四千一百零五元，升幅接近百分之七，肥牛每擔加二百三十元至四千三百一十元，升幅百分之五點六。羊毛當然出在羊身上啦，面對批發價格又飆升，商販講到明會將加幅轉嫁到消費者身上，牛肉零售價上調百分之五至十，普通牛肉每斤超過一百元，肥牛就由每斤一百四十元加至一百六十元。
五豐行今年係第幾次加價呢？真係多到一隻手都數唔晒，總而言之，加完又加，加完再加，加加加加。所以話啫，食牛肉尤其係食肥牛已經變成一種富貴榮華嘅身份象徵，窮少少都食唔起呀！
成日都話高高在上嘅官老爺不食人間煙火，好彩，原來食衞局局長高永文都屬於食牛一族。高局長喺一個電台節目話呀，今年牛肉加價幾次，去到一個令到佢都好不安嘅情況，業界多次向佢反映問題嚴重性，亦有業界表示經營困難。所以局長大人就話嘞，食衞局預計需要兩三個月完成內地牛肉市場價格調查，以取得較科學嘅資料作出開放市場嘅決定。高永文以堅決語氣表示：「如果證據顯示，開放市場真係可能令牛肉價格下降，我不會遲疑開放。」
計功夫茶話齋，早就應該開放市場啦，家陣嘅供港活牛係獨家經營，即係缺乏競爭，等於壟斷市場。喂，市場被壟斷好大鑊o架，大家睇下獨家經營嘅電力公司吖，話加價就加價，小市民肉隨砧板上任人宰割。即使免費電視表面上唔係獨家經營，不過由於慣性收視一台獨大，另外嗰個淨係識得全球獨家報喪嘅電視台長期積弱，造成嘅局面同壟斷市場冇乜分別o架咋，所以輿論幾乎一面倒支持增發免費電視牌照，畢竟引入競爭先至有望帶來進步。
當然啦，有業界人士認為開放市場都未必會令到牛肉價格下降，因為運輸成本好重。對於呢個講法，功夫茶覺得高永文應該大戰牛魔王囉，即係同壟斷市場嘅活牛供應商斟酌一下。即係咁，就算引入競爭未必令到牛肉價格下降，起碼冇人夠膽死動不動就加價啦。開放市場如果達到反加價嘅效果，始終係一件好事，過節有得食肥牛先至叫做快樂聖誕吖嘛！