有獎遊戲幾時都咁受歡迎，好似中華總商會日前嘅聖誕聯歡晚會上大玩幸運Bingo遊戲，玩法係席上每人獲派發一張數字卡，由台上主持陸續抽出號碼，如果打直、打橫或者打斜連中五個數字，大聲叫「Bingo」就可獲獎。有「牛仔褲大王」稱號嘅中總會長楊釗都玩埋一份，仲好認真咁戴上眼鏡，金睛火眼(目及)實張數字卡，結果佢好幸運「連中五元」，隨即雀躍上台領獎，縱使獎品只係一袋幾支嘅護膚品，但佢一樣笑到四萬咁口，認真童心未泯。
