政情：公民講場：吳克儉吐心聲 做局長唔多掂

身困熱廚房半年後，教育局局長吳克儉終於爆出心聲，其實佢從來都無諗過做局長。話說樂融會總幹事王惠芬四度上書求見，仲搵埋政務司司長林鄭月娥告御狀投訴，點知原來林鄭都只係可以幫佢將封信轉介去教育局。經過萬水千山，王惠芬呢個月二十日終於有機會跟埋社聯廿個機構一共近百人，一睹吳局長風采，可以向佢陳述現行學制對少數族裔學童嘅種種不公。點知吳克儉一開口就話，自己根本無諗過做局長，搞到王惠芬個心寒咗一半。之後吳克儉就解畫話，自己一直做人力資源專業，只係喺考評局做下義務工作，所以真係無諗過做局長，但當佢一知道新政府將面臨挑戰，使命感亦油然而生，即刻內心火熱加入新政府，咁唔知依家熱廚房咁熱，係咪因為佢嘅熱心造成嘅呢？