政情：陳勇禦寒 沖多幾次涼
平安夜最低氣溫得十度左右，新界區仲會凍啲，但新當選港區人大代表嘅新界社團聯會理事長陳勇，尋日無懼寒風，一早就去咗大嶼山昂坪參加天壇大佛開光周年紀念典禮，而且只係比平時着多咗一件棉襖。陳勇仲主動教長者四招禦寒，但當中有啲招數比較偏門，未必個個長者都適合o架！
教長者手指梳頭促進循環
陳勇透露，自己本來都相當怕凍，以前冬天要着好多衫，但後來有位中醫教佢「多浴少衣」，即係寧願沖多幾次涼，都唔好着咁多衫，否則成日焗住啲皮膚，反而減低身體自行調節溫度嘅功能，因此佢平日除非晏咗起身，否則盡量都會早晚各沖一次涼。
陳勇又教長者每朝起身後，用手指輕按頭皮扮梳頭，話呢個動作可以增進腦部血液循環，令到個人成日都暖笠笠。佢又建議長者把握冬天有陽光嘅機會，多啲出去散步，以及喺正餐之外食多啲餅乾同麵包等零食，增加熱能吸收，咁就可以減少凍親嘅機會喇。