政情：貪曾膺「奸帝」當之無愧

特首選舉呢場重中之重嘅政壇大戲，由去年尾上演到今年初，劇情峰迴路轉，令唔少人捧腹大笑或悲憤落淚，勇奪最佳影片絕對實至名歸。前政務司司長唐英年，原本畀各界睇高一線，可惜佢喺僭建地下王宮一事上愈講愈錯，即使出埋「你呃人」呢句曠世金句同大爆行政會議機密，都唔可以扭轉佢自掘墳墓嘅事實，最後仲將特首寶座拱手相讓畀後來居上嘅梁振英。

拉布鬧劇奪「爛片王」

有最佳影片就一定有最爛影片，今年嘅「爛片王」首選耗資巨額公帑、而且一連三集、拍極唔厭嘅立法會拉布戰。立法會今年拉布仲多過開會，泛民主派議員由立法會出缺機制、拉到五司十四局架構重組，並喺選舉換屆後再拉過，搞到長者生活津貼差啲過唔到，四十萬合資格長者每周開住電視睇立法會直播，悶到抽筋但又唔敢轉台，哭笑不得。好彩最後有建制派「剪布」同勞工及福利局局長張建宗「突襲」，否則呢場爛戲可能過埋年都未落到幕。

今年政壇中人醜態百出，要選最佳男女主角真係好難，但要選「最奸男主角」，就非貪盡海陸空嘅「貪曾」前特首曾蔭權爵士莫屬。今年二月起，東方報業集團一一撕破貪曾嘅貪婪真面目，包括佢多次乘坐富豪遊艇同私人飛機、擬用特平租金租用「深圳禮賓府」、喺官式外訪中多次入住超豪總統套房，就連落台後都繼續亂花公帑豪裝前特首辦公室同涉嫌偷飲公家靚酒，真係貪到無人有。據聞廉政公署仍然喺度調查緊有關案件，明年隨時會上演續集，劇目可能會係《反貪污、捉貪曾》、《公審香港第一貪官》等！

暴瘦林鄭當選「慘后」

喺特首選舉中受盡委屈、多次公開落淚打救老公嘅唐太郭妤淺，以及為咗新政府而變身高官保母，並因而暴瘦嘅政務司司長林鄭月娥，雙雙當選今年嘅「最慘女主角」。「最突出新人獎」方面，由姓名同樣有個「雲（芸）」字嘅兩位女士奪得，一個係因為喺立法會投票撳錯掣，間接撳走埋個黨主席寶座嘅民主黨議員黃碧雲，另一個係因聲大夾惡而火速走紅嘅民建聯副主席蔣麗芸。今年政壇又有特別多人東山復出同敗部復活，包括「雙光」前高官李少光同林煥光，仲有由立會落選人變身政制及內地事務局副局長嘅劉江華。