中環出更：菁英聖誕P 勁跳騎馬舞

莊家彬陳振邦犧牲「色相」

菁英會人強馬壯，眨眼又有第十四期學員誕生。今次Party由佢哋擔大旗，珠寶公司太子女龔嬿、IT界女強人李煥明齊做籌委會主席；喺電台開慣咪嘅鄺晶晶就係「索爆」司儀。以「華麗荷里活」為主題嘅派對，賓客奉旨扮嘢。

當晚每圍枱都要派出代表，用聖誕裝飾裝身，莊士集團太子爺莊家彬（Albert）同莎莎女婿陳振邦（Davis）好玩得，犧牲「色相」任舞唔嬲。兩人裝扮夠晒俏，更加被選中入埋「六強」，可惜扮相唔及得女子組咁風騷，最後都輸咗。Davis就話無所謂，最緊要開心，太太郭詩慧就邊笑邊幫老公影相，玩得勁投入。

楊華勇（前排中）聞歌起舞，大跳「江南Style」。	着晒成身聖誕裝飾嘅莊家彬，自信十足。	莎莎太子女郭詩慧（右）打算同老公陳振邦及囝囝遊迪士尼，享受聖誕樂。

派對上，新舊「菁英人」聚首一堂，包括創會主席施榮忻、榮譽主席白富鴻、洪為民（Witman）、副主席鄭重科等，熱鬧到極。

咁啱得咁蹺，Johnny爸爸楊孫西生日，佢連走兩場，同爸爸賀完壽，再飛奔跑嚟陪班兄弟姊妹狂歡，見佢飲到面紅紅，high到極。聽見會場播起「江南Style」，一個箭步走出舞池大跳騎馬舞。梁宏正同Witman都跳埋一份，帶動全場起哄，個個開心到唔捨得走。

卓妮