大家有冇睇過專制社會嘅新聞報道？如果一個社會毫無言論自由，新聞報道係有一套既定方程式o架，情況大致上就係咁：我國很好，領導很強，外國很慘。若然閣下相信北韓電視台，平壤簡直係天堂，首爾當然係地獄。
假如係一個擁有言論自由嘅社會，情況就截然相反嘞，例如美國咁吖，新聞報道基本上唔會有好消息，領導幾乎都係壞蛋，所以英文有一個講法係No News Is Good News，冇新聞先至係好消息咁解。
功夫茶今日到底想講乜呢？即係咁，財政司司長曾俊華唔知係咪想香港變咗一個冇言論自由嘅專制社會，佢居然將香港同新加坡比較，大讚人哋嘅傳媒「鋪天蓋地報喜」，相反香港傳媒對於好消息就冷淡得多。
鬍鬚曾有感而發嘅導火線係一場拳賽，年僅二十五歲嘅曹星如技術擊倒對手，贏咗「亞洲洲際金腰帶」，成為香港第一個全職拳王。鬍鬚曾身為黃飛鴻唔知第幾代弟子，算得上係一個武癡，睇直播見證曹星如摘金當然興奮到飛起啦。第二日佢老哥打開報紙一睇，各報只係得小小篇幅報道，所以呢一個官場武癡就非常失落嘞。
為咗呢件事，鬍鬚曾寫網誌發表偉論，佢好感嘆咁話，近年有個講法話陰謀論喺香港頗有市場，而末日論炒得熱烘烘，某程度亦反映社會上有一種「恐懼心態」。新加坡傳媒每遇好消息都鍾意一面倒鋪天蓋地咁報喜，令到財爺趨之若鶩。
講到呢度，功夫茶不妨同大家分享一個心得，其實天下烏鴉一樣黑，所有做官嘅人都唔想傳媒揭發社會陰暗面，最好就係粉飾太平歌功頌德。問題係，唔同嘅社會有唔同嘅制度，美國官僚一樣唔鍾意傳媒報道壞消息、陰謀論以及末日論，只不過呢一個國家有明確嘅制度保障言論自由，所以美國新聞工作者先至可以繼續先天下之憂而憂。
睇番香港吖，萬一冇咗相對文明嘅法治制度，特區政府必定第一時間箝制言論自由，以免傳媒踢爆社會陰暗面，最重要嘅係防止官場嘅腐敗大白於天下。大家試想想，東方報業集團假如只准報喜不准報憂，前特首曾蔭權嘅涉嫌貪污會被揭發咩？若然曾爵士鬼鬼祟祟官商勾結居然冇人知，其他腐敗官僚缺乏傳媒監察，司長局長唔係違例僭建就係詐騙公帑，廉潔奉公嘅核心價值摧毀咗九世啦！
所以咯喎，功夫茶奉勸曾俊華一句，死咗你條心啦。香港一日有言論自由，傳媒一日都會報憂不報喜，事關作為第四權嘅新聞工作者，係冇可能扮演歌功頌德嘅小奴才嘅！
有仇不報非君子，有憂不報枉傳媒，講完。