立法會議員開會經常吹水唔抹嘴，都咪話唔悶。好似上周五財務委員會開會期間，我哋就發現財經事務及庫務局局長陳家強喺度猛咁玩手機，見佢聚精會神係咁睇，望清楚佢個螢幕，原來有個着住粉紅色衫、白色熱褲、擺緊S形甫士嘅美女，唔怪得佢睇得咁入神啦！不過，依家啲網頁經常彈出廣告，話唔定個靚女係突然「彈」出嚟等局長醒吓神。其實之前財委會討論長者生活津貼撥款申請時，社民連梁國雄都一路拉布，一路公然上網睇波啦，議員自己都頂唔順漫長嘅會議，又好難怪得晒啲官員開會唔專心嘅。
