政情：收料站：談情兼High Tea 伍穎梅有介紹
跑馬地山光道馬會會所一向係唔少名人嘅蒲點，除咗喺度游水健身，仲可以坐低歎番杯茶，過一個逍遙自在嘅下午。有九巴「金公主」之稱嘅九巴董事伍穎梅（Winnie），閒時最愛到山光道會所內嘅打吡餐廳及酒吧（Derby Restaurant & Bar）歎下午茶。
餐廳加酒吧 謝絕細路
Winnie話，鍾意Derby嘅原因特別，原來係貪嗰度限制小童進入，夠晒清靜，而且人流唔多，方便傾偈。如果佢同男友一齊去歎茶或飲嘢，寧靜嘅環境真係啱晒談談情說說愛。
Derby分上下兩層，下層係酒吧，燈光柔和，限定時段仲有歌手駐場演唱，氣氛唔錯。上樓梯後就係餐廳，座位寬敞，裝修典雅大方，食物以法國菜為主，三文魚、鵝肝、生蠔等菜式都有供應。不過，Derby入場規格嚴謹，除咗十八歲以下人士不准進入外，連着牛仔褲、波鞋、T-shirt都謝絕內進，當然幫襯嘅要係馬會會員啦！