政情：「力保名單」貪新忘舊
第十二屆港區人大代表選舉明早就投票，由一千六百多名選舉團成員，以全票方式選出三十六位新代表及四名候補代表。港區人大選舉係富有「中國特色」嘅選舉，選前傳出多張「力保名單」，當中盛傳最權威嗰張名單，有多達十四位新候選人入圍，而且排名仲前過好多角逐連任嘅現任港區人大，凸顯操盤人「貪新忘舊」，希望為港區人大引入新血。至於排在名單末段嘅「老餅」舊人，就只能自求多福喇！
今屆選舉共有五十二名合資格候選人，當中廿三人係角逐連任，廿九人為新參選或再次參選，包括前公民黨南區區議員司馬文及教協方景樂兩位泛民主派人士。之前親中圈子已盛傳一張四十人名單，列出操盤人屬意嘅卅六名代表同四名候補代表，兩名泛民成員當然冇份，但廿三名舊人則全數入局，令佢哋以為自己今次坐定粒六。
李少光張明敏入圍
不過，根據最新一張「排名有分先後」嘅權威名單，就令到部分舊人抹汗，皆因其中十四名新人嘅排名，竟然比佢哋呢班「老餅」仲要高，呢十四人除咗係人都知會高票當選嘅前保安局局長李少光等老資格嘅候選人外，連臨時頂替全國青聯副主席陳仲尼參選嘅全國青聯常委姚祖輝、盛傳曾被中聯辦勸退嘅中華出入口廠會代表張明敏、以至著名中醫馮玖都入圍。
最嚇人嘅係，港區人大代表得卅六個，操盤人力捧十四位新人，即係廿三名舊人之中最少有一人得唔到祝福。再者人大選舉始終都係選舉，千六名選民並非全部都係識時務嘅俊傑，當中有百多票仲係泛民人士，喺全票制下足以左右最後幾席嘅勝負。排在力保名單較後位置嘅舊人，即使得到操盤人祝福，亦隨時有落選危機。
劉健儀田北辰勢危
眾多舊人當中，據聞以三位有非傳統左派政團背景嘅候選人排名最後，亦即最高危，佢哋係前經濟動力成員梁劉柔芬、自由黨前主席劉健儀及新民黨立法會議員田北辰。其中劉健儀同田北辰不獲力保，估計同佢哋過去多次上書及公開批評中央有關。三人能否力挽狂瀾成功當選，明日上午就會揭曉。