中環出更：莎厘娜餐廳結業 港大校友依依
本港樓市上升連帶舖位都超級升值，唔少業主都選擇放盤賺番一大筆，卻苦了做生意嘅租客。多年來被視為香港大學學生同教職員飯堂嘅般含道「莎厘娜餐廳」，開業近半世紀也不敵時代巨輪，因為舖位業權易手而要喺明年初同街坊講拜拜。飲過「莎厘娜」招牌羅宋湯嘅港大名人校友，都對餐廳結業感到可惜，最近紛紛抽時間返去食番餐，緬懷學生時代嘅難忘事。
港大校友、中華廠商聯合會行政總裁梁世華揮筆疾書一首打油詩，贈予人稱「王叔」嘅餐廳老闆王殿華。佢話曾幾何時，俄國餐喺本地飲食業中甚具江湖地位，車厘哥夫、雄雞等都係家喻戶曉嘅俄國餐廳。不過，時至今日俄國餐廳屈指可數，如果王叔未能另覓舖位復業，莎厘娜嘅羅宋湯就恐成絕響。莎厘娜羅宋湯確實令好多人一試難忘，就連港大校長徐立之去年亦頒發感謝狀以作表揚。
張永霖讚四十年如一
梁世華嘅港大同學，明德學院校董會主席張永霖（Linus）就話，佢喺中學時代就已經幫襯莎厘娜，迄今逾四十年，縱使歲月流轉，但餐廳嘅食品質素始終如一，令人讚賞。所以佢鍾意喺莎厘娜包場宴客，而餐廳內嘅一幅古地圖與清代狀元莊有恭嘅對聯，就係佢十年前所送贈。雖然Linus同王叔一家十分稔熟，但佢話唔會太過傷感，因為凡事有始必有終，但佢會喺臨別前再包場搞一次Party咁話。
至於港大醫科畢業嘅食物及衞生局局長高永文憶述，七十年代初次幫襯莎厘娜，餐廳嘅紅菜頭，薯仔沙律同羅宋湯都係前所未試嘅口味，令佢印象深刻。曾於港大就讀機械工程嘅立法局議員盧偉國就話，羅宋湯味道濃郁只此一家，而俄國牛柳絲飯亦令佢再三回味，當年一儲夠錢就會去歎番餐，而餐廳仲係男生邀約心儀女生嘅場所。所以莎厘娜咁令人懷念，唔單止係美食，仲因為佢係港大學生嘅集體回憶。
卓妮