勁勁勁！香港爛船尚有三斤釘，競爭力依然冠絕全國！
弊弊弊！香港競爭力遲早坐食山崩，有朝一日必然被邊緣化！
功夫茶點解又話勁又話弊？無他嘅，人無遠慮必有近憂。中國城市競爭力研究會公布二○一二年中國城市競爭力排行榜，香港繼續保持榜首位置，第二至第五位分別係上海、北京、廣州同深圳。另外，香港喺中國國際化城市榜以及國際友好城市榜勇奪冠軍，世界城市綜合競爭力排行榜位列第七，排前三位嘅分別係紐約、倫敦同東京。
連續十一年以來，香港嘅綜合競爭力蟬聯全國第一，呢個本來係唔錯嘅消息。之不過咁，中國城市競爭力研究會會長桂強芳講咗一番發人深省嘅評論，佢話呀，上海同北京嘅經濟總量已經超越香港，不過香港有完善嘅法治制度、成熟嘅社會體系，仲有專業嘅人才隊伍，所以仍然能夠保持全國第一嘅競爭力。副會長謝賢程更加分析，香港政府有愈來愈多行政措施干預自由市場，對競爭力造成隱憂，早前推出嘅買家印花稅就係其中一個例子。
你話嘞，係咪弊一弊都冇咁弊吖？人哋上海同北京發憤圖強，經濟總量已經超越香港喇，家陣嘅香港只不過食老本，靠嘅係相對完善嘅法律及制度先至可以勝人一籌咋。萬一啊萬一，偉大祖國知恥近乎勇，唔再搞人治而去搞法治，切切實實依法治國，唔再任由長官意志朕說了算，香港連呢啲優勢都冇埋，容乜易墮落為中國二三線城市o架！
唉，講開又講吖，香港目前嘅狀況真係令人百感交集，淨係昂貴嘅租金已經玩死人。好似新鮮出爐嘅《米芝蓮指南香港澳門2013》咁吖，係就係推介咗二百四十四間香港餐廳，但係你以為得獎食肆會開心咩？未必o架，因為人怕出名豬怕肥，食肆一經金榜題名，業主就會飛擒大咬，話唔定瘋狂加租。花園街有一間馳名麵家嘅老闆就慨嘆嘞，米芝蓮美食難敵貴租，原本位於西洋菜南街嘅總店雖然受到米芝蓮推介，最終捱不起貴租而結業。即係話，香港營商成本愈來愈高，遲早冇晒競爭力嘅咋。
再睇睇另一個報告吖，人力資源顧問公司MERCER調查過全球二百二十一個城市嘅居住環境，結果顯示奧地利首都維也納係全球最適合居住嘅城市，因為當地有完善嘅醫療制度、適中嘅房屋價格以及蓬勃嘅文化活動等等。至於全球排名七十嘅香港，繼續被新加坡遠遠拋離，人哋連續兩年成為亞太區最適合居住嘅城市呀！
即係咁，如果唔想坐以待斃，香港必須自強不息，最低限度特區政府唔好再蹉跎歲月吖，唔該！