近日有醫學美容集團爆出毒血針事件搞出人命，鬧得滿城風雨，到依家都仲有手尾跟。原來呢間美容集團嘅客源好廣，據聞連上流社會都有唔少名人去幫襯，其中一位就係「香香夫人」。
香香夫人老公係香港大地主之一，都算係有頭有面，聽聞毒血針事件後，香香夫人都唔敢周圍同人講自己曾經幫襯過間嘢，費事外界知道佢貪平，影衰老公。
據講「香香夫人」幫襯嗰間美容集團好多年，稱得上係熟客仔，亦試過打過早前爆出嘅「毒血針」，但之後有冇發生咩意外，就冇人知道喇，只係知佢以前成日同人講間美容集團有幾好，但當間集團一出事後就再冇幫人宣傳，亦唔敢再幫襯，只係圈內人知道佢呢件事。
雖然「香香夫人」並非活躍於政壇，但佢老公就係政壇嘅大紅人，而且喺政經界打滾多年，人面都非常廣，如果畀人知道佢老婆都有去幫襯呢間出事嘅美容集團，分分鐘笑到佢臉都黃，所以有錢人都有佢哋嘅苦衷同煩惱。不過，無論後生或上年紀嘅女人，美容都係一樣重要嘅必需品，惟有選擇美容療程前小心啲囉！