「五百蚊人情」事件早前成為城中熱話，女主角慘被網民人肉起底，所有資料統統被公開，絕對係網絡欺凌最佳例子。民建聯立法會議員鍾樹根同立法會保險界代表陳健波都關注呢件事，下星期會提出質詢，但估唔到鍾樹根入晒戲，好似當正自己被欺凌咁，猛問被人起底後可唔可以報警，似乎佢關心自己多啲喎。
鍾樹根嘅代入都係情有可原，因為早前畀網民發現佢錯字連篇，仲笑佢係一舊雲，所以鍾樹根條質詢特別肉緊，問如果網民發現自己畀人起底後，同時向政府同警方求助，到底雙方可唔可以提供幫助，同埋到底可以點幫，又問政府究竟有冇做好青少年教育工作。問得咁貼身，睇怕鍾樹根想寫定本「起底求生手冊」畀自己喎。唔知佢係咪上次畀網民Hurt得太深，所以要諗定辦法自保呢？
反而保險界陳健波就問得好正路喇，照咁睇應該冇畀網民欺凌過嘞。佢只係問過去五年私隱專員收到幾多投訴係關於網絡欺凌，同埋有冇人因為咁畀人起訴。真係估唔到同一條質詢，都有咁大分別。