政情：馬逢國為妻搣甩肥肉
立法會體育、演藝、文化及出版界議員馬逢國重返議會，身形似乎沒有最弗，只有更弗。佢自爆其實早年都係肥佬一名，體重更一度逼近二百磅，身體指標「滿江紅」項項都超標，究竟係咩驅使佢決心減肥，又有咩絕招搣走肥肉呢？
依家體重已經回落到一百六十磅嘅馬逢國笑笑口話，八年前為咗照顧患癌嘅太太而棄選立法會，期間自己都去檢查吓身體，結果一係唔查，一查即時嚇親！當時體重幾近二百磅嘅佢，睇見報告嘅身體指標全部超標外，飲食失衡下更出現脂肪肝。
愛妻心切嘅佢為咗唔想屋企再有人病，當下就決心減肥，除咗戒甩至愛嘅燒雞皮外，更日日跑步做運動，加上每餐食少啲，兩個半月即減去二十五磅，比起好多女明星減得更快更健康，體重一年內已經回復昔日光輝，連好難斷尾嘅脂肪肝亦成功搣甩，肥佬西裝從此拜拜！
尋日天寒地凍，好多議員開會都喺西裝褸入面加件內膽保暖，只見馬逢國好自豪話件夾心外套已經着咗近二十年，就算之前肥到着唔落都唔捨得丟，皆因佢話自己懷舊又專一，連西裝同皮鞋都鍾意着舊嘅，話舊鞋好着啲喎。