政情：梁粉選人大 騰騰震
即將舉行嘅港區全國人大代表選舉競爭激烈，共有五十二人爭奪三十六個人大席位，原本各有各奮力拉票，但最近忽然傳出部分屬於「梁粉」嘅人大參選人，對個人選情騰騰震，好擔心新政府面對嘅難關及特首梁振英（CY）最近嘅僭建風波，令人大選舉再次分為「唐」、「梁」兩大派角力，恐怕最終不獲唐營選委支持而落選。而當中最大壓力嗰位，唔知係咪作為忠實「梁粉」嘅行政會議成員羅范椒芬呢？
話說喺三月特首選舉中，建制派曾明確咁分開咗「唐」、「梁」兩大陣營，就算CY當選後表明香港只有一個「香港營」，但「大和解」目標仍未到位，而CY嘅僭建風波一直被反對派狙擊。喺人大席位競爭激烈下，聽聞部分忠實嘅「梁粉」人大參選人開始憂慮，話萬一社會有輿論將「唐、梁」兩大陣營劃分嘅話，除咗令佢哋失去一啲「深唐」選委嘅票源，更甚係如果得票比上屆少嘅話，難免會被人有話柄，會話CY喺僭建事件後，連選委嘅信任度亦失去。
已報名參選人大嘅五十二位參選人之中，有二十三人競逐連任，如果呢二十三人都順利當選嘅話，即餘下只有十三個議席由二十九人爭奪，亦即平均每一席有超過兩人爭奪，最後六、七個席位勝負更可能只相差十多票，所以一票都不能少，否則隨時落選。如果最後選舉真係出現「唐、梁」營之分，一批「梁粉」人大參選人如羅范椒芬、胡曉明、行會成員查史美倫、工聯會榮譽會長鄭耀棠及理事長吳秋北等，選情豈不是大事不妙？
梁營胡曉明與唐唐拉關係
咁啱得咁蹺，形容自己「處女下海」參選人大嘅「梁粉」胡曉明（Herman）尋日話，CY喺山頂大宅僭建事件上肯拆肯認，係好過唐英年，所以唔擔心CY會影響佢嘅選情。不過，Herman同時又強調自己同唐唐家族好有緣，仲話爸爸胡法光同唐父唐翔千係好朋友，而自己同唐唐太太郭妤淺嘅家人都係好熟添，佢之所以支持CY，只因為曾經同CY共事過，肯定CY嘅能力喎！佢仲透露，香港五年後一定會普選特首，而CY亦會參加添！