中環出更：名流出錢出力 助地貧童

已成立二十年嘅地中海貧血兒童基金會，上周六晚喺灣仔君悅酒店舉行大型籌款晚宴，現場布置得好似海底世界，好有心思。基金會主席鄭正訓及籌委會主席梅韋祖蒂（Judy）一早到場迎賓，捧場嘅城中名流眾多，包括恒基地產副主席李家誠及太太徐子淇、前東華三院主席王忠桐、基金創辦人楊執庸醫生、中華廠商聯合會會長施榮懷夫婦及前高官馬時亨（肥亨）一家等，現場衣香鬢影，氣氛好熱鬧。
馬露明（左一）及周國豐（右一）齊齊扮嘢比賽，玩得好盡興。
馬露明（左一）及周國豐（右一）齊齊扮嘢比賽，玩得好盡興。

當晚節目高潮迭起，首先係慈善拍賣環節，多次出現激烈競投嘅場面，尤其係Judy囝囝梅慶豐捐出旗下金鐘舊軍火庫嘅Ammo餐廳包場三小時，加送酒水任飲，由底價兩萬元起拍，結果引起一場激戰，連「千億新抱」徐子淇都加入戰局，最終由王忠桐以十五萬元成功投得，全場拍爛手掌。

咁仲未夠，接近尾聲嘅扮嘢大賽引爆全場爛玩氣氛。社交名人周國豐、肥亨嘅大女馬露明等人，都被打扮得奇趣搞笑參賽，最終周國豐以騎呢美人魚造型打入三甲，贏得一支靚香檳與同枱好友盡情暢飲。有份幫囡囡搞騎呢造型嘅肥亨，當晚心情靚爆，佢同卓妮報喜訊話，細女露玲明年十月將正式擺酒結婚，到時兩位千金都有美好歸宿，佢就無憂無慮喇！

馬時亨夫婦（前左一、二）同大女馬露明及夫婿Kevin（後左二、一）、細女馬露玲及男友（後右二、一）一家到場支持；同枱巧遇前無綫高層陳慶祥及太太前港姐馬倩衡（前右二、一）。（葉華英攝）
  • 馬時亨夫婦（前左一、二）同大女馬露明及夫婿Kevin（後左二、一）、細女馬露玲及男友（後右二、一）一家到場支持；同枱巧遇前無綫高層陳慶祥及太太前港姐馬倩衡（前右二、一）。（葉華英攝）
廠商會副會長吳永嘉（左）捐錢支持基金會。
  • 廠商會副會長吳永嘉（左）捐錢支持基金會。

成功籌200萬善款

見晚宴搞得咁成功，笑言碌爆人情卡嘅Judy好開心，未計當晚拍賣所得，大會已為基金籌得逾二百萬元善款。Judy為咗搞籌款活動，忙到冇覺好瞓，大喊吃不消，所以忙完籌款活動之後，第二日就同幾位知心好友飛赴日本京都賞紅葉，話要徹底抖吓。今次京都團有八位靚太，包括Judy好姐妹、度身訂造品牌詩閣太子爺張宗琪太太等，應會玩得好盡興。

李家誠（右）及太太徐子淇（左）悠閒享受晚宴，以行動支持基金會。（余素月攝）
  • 李家誠（右）及太太徐子淇（左）悠閒享受晚宴，以行動支持基金會。（余素月攝）
梅韋祖蒂（左一）瞓身籌款，老公梅應春（中）、囝囝梅慶豐（左二）及老友施榮懷夫婦（右二、一）鼎力支持。
  • 梅韋祖蒂（左一）瞓身籌款，老公梅應春（中）、囝囝梅慶豐（左二）及老友施榮懷夫婦（右二、一）鼎力支持。

卓妮

第一手消息請下載on.cc東方互動iPhone/iPad/Android/Windows Phone Apps