政情：司馬文參選人大創歷史
本身係荷蘭人嘅南區區議員司馬文，之前成功攞到中國籍，但公民黨唔肯支持佢參選立法會，令佢憤然退黨。不過佢轉換國籍嘅行動最後並無白費，因為已決定參加今屆港區人大代表選舉，聽日就會去報名。
雖然大家都知佢勝算極微，但佢今次參選已經創造歷史，包括成為今屆港區人大選舉唯一一位泛民參選人，仲可能係歷來首位參選港區人大嘅老外。
參選港區人大除咗要有中國籍，亦最少要攞夠十個選舉團成員提名。據知司馬文至少已攞到十五個提名，清一色係泛民人士，包括幾位前公民黨黨友、三名泛民立法會議員莫乃光、衞生服務界李國麟同民協馮檢基等。
白鴿縮骨 未必抬轎
但民主黨就最縮骨，話要開過中委會，睇吓司馬文嘅參選理念同該黨立場是否一致，先會決定係咪提名佢喎。
司馬文嚟緊會向選舉團內嘅大約一百名泛民人士，以及一啲立場相對中立嘅建制派人士拜票，希望就算輸都唔好輸得太肉酸啦。