出名無理取鬧
「正盲毛」為乜爆粗，原來係為咗好小嘅事。話說佢所屬嘅政團就某項議題發出新聞稿前，向負責相關政策嘅黨員徵詢意見，但「正盲毛」並不知情。「正盲毛」喺發現事件後，就發晒爛渣打畀將新聞稿畀過議員嘅黨友，旁若無人咁，爆粗大鬧對方唔尊重佢，當佢冇到。實情「正盲毛」根本就唔係負責有關政策，按慣例毋須問過佢，根本係無理取鬧。
查實「正盲毛」同黨友嘅關係早已麻麻，成日當自己係大阿哥同通天曉，乜都要加把口同質疑人哋做得唔好，令今次爆粗事件迅速喺黨內瘋傳，甚至有人要求黨高層介入「整治」下「正盲毛」。不過據聞有關高層都怕鬼咗佢，費事成家都畀人問候埋。