中環出更：西餐都用甜醋 伍錦康開懷
因為龍年效應，今年香港出生率特別高，連帶以售賣甜醋起家嘅八珍集團今年生意有雙位數升幅。作為八珍掌舵人嘅董事總經理伍錦康當然眉飛色舞，展望將來滿懷信心，佢話因為甜醋呢種咁傳統嘅中國食材，已經唔再限於煲豬腳薑，而係可以走入西餐食譜大玩Fusion咁話。
伍錦康話甜醋之所以跳出框框，係因為有一位美國顧客嘅意見回饋，話將甜醋淋落雪糕度食，酸酸甜甜特別滋味，於是佢就靈機一觸，發覺甜醋同意大利黑醋有類同之處，不妨同其他食材配搭，例如意式沙律佐以甜醋，口味令人耳目一新。呢種嘗試亦得到部分西廚嘅認同，佢話本地有某一間獲米芝蓮二星評級嘅餐廳，就係用八珍嘅甜醋嚟炮製一些西餐菜式。
八珍八十周年，佢哋喺將軍澳嘅新廠房亦宣布啟用。生產甜醋耗能極高，新廠房講究節能設計。伍錦康嘅一對子女尋日亦有出席周年慶典，其中囝囝伍尚鈞係建築工程系博士，囡囡係前財經事務及庫務局政助伍潔鏇。不過佢哋都話目前無意接掌家族事業。
卓妮