僭建，又係僭建，僭建新聞愈爆愈多，愈爆愈臭，香港「僭建之都」嘅外號相信好快就可以正名咯！
咦，人人講僭建，但有兩單權貴僭建醜聞講講吓就無人再提起，政客唔提，政府唔提，唔通權貴僭建好似八萬五咁，唔提起就不存在？嗱，當局梗係想不存在喇，問題係市民唔肯呢。
無錯，功夫茶講嘅兩單權貴僭建醜聞，咪就係前政務司司長唐英年「掘深咗」嘅二千四百呎「地下王官」，以及前食衞局局長周一嶽嘅密封露台囉。市民無失憶，不過兩位醜聞中嘅前高官就想扮失憶喎，事發超過半年，僭建物仍然原封不動，咁仲有王法嘅？
喂，唐唐及周一鑊為官就話渾渾噩噩啫，市民頭腦不知幾清醒，唔止對你哋施政無能一清二楚，對你哋嘅僭建醜行一樣記憶猶新。唐唐今年二月被踢爆九龍塘大宅僭建「地下王宮」，觸發全城怒火，政府部門急急補鑊，屋宇署五月完成調查報告，廉政公署更加介入調查添。哈，點知你有你調查，佢有佢吊吊揈，本報記者近日再到唐宅視察，現場毫無工程迹象，地下王宮依舊原封不動，好似冇咗件事咁，問你服未。
正所謂，物以類聚，人以群分，唐唐吊吊揈，周一鑊亦係軟皮蛇，今年五月被本報踢爆港島加列山道豪宅違規用玻璃圍封露台，屋宇署敕令佢一個月內移除僭建物，但係事隔六個月，有關僭建物又係原封不動。半年嘞，唐唐個「地下王宮」就話世紀工程啫，周一鑊你唔係無能到半年都拆唔走個違規玻璃露台啩！
對於呢兩個死不悔改嘅僭建無賴王，屋宇署點講呢？講廢話囉，指業主已經提交補救建議書喎，署方會繼續跟進喎。廉署仲離譜，一句不評論個別案件就耍完太極。
唉，大家終於知道僭建無賴王點解目無法紀啦，執法嗰個都唔嗲唔吊，放軟手腳，犯法嗰個梗係吊吊揈、軟皮蛇啦。正如學者宋立功話齋，周一鑊嘅僭建唔算複雜，咁耐都未搞掂，難免令人覺得係官官相衞！
嗱嗱嗱，講到官官相衞，就不得不提前朝高官僭建俱樂部揸弗人煲呔曾爵士嘞。貪曾去年五月被本報踢爆半山「祖屋」僭建，違例將露台圍封，全城聲討之下都要拖到九月至肯清拆，貪曾既然係僭建禍首咯喎，唐唐及周一鑊呢啲「曾朋友」仲唔有樣學樣咩。
咪話功夫茶唔提醒吖，屋宇署同廉署仲唔快快撥亂反正，郁手拆毀「曾朋友僭建黨」，遲早被市民拆招牌o架咋！