政情：廢腑之言：阿涂冇原則廢噏當秘笈
民主黨立法會議員涂謹申（阿涂）一向自稱保安專家，又標榜自己重視市民嘅人權自由，過往審議《基本法》第二十三條立法同《反恐條例》時，均大力反對執法機關可輕易獲取法庭手令，進入市民住所搜查或拉人，但尋日佢居然建議屋宇署單單就特首梁振英（CY）山頂大宅一幅與圖則不符嘅外牆，向法庭申請手令入屋調查，明顯係為咗攻擊CY而背棄原則，胡亂廢噏。
阿涂聲稱梁宅嘅疑似僭建密室位於一條行車路之下，涉及安全問題，同一般懷疑僭建唔同，屋宇署應有足夠理據向法庭申請手令喎！咁點解懷疑有人叛國、顛覆、煽動叛亂、分裂國家、竊取國家機密、與恐怖組織有聯繫等，佢就反對執法機構喺無真憑實據之下強行入屋呢？依家佢係咪有證據指控CY喺呢幅外牆內有不可告人嘅秘密先？