政情：公民講場：區載佳欺善怕惡 僭建放生一鑊

食物及衞生局前局長周一嶽（周一鑊），今年五月被本報踢爆佢喺山頂加列山道嘅豪宅僭建，非法將個露台完全圍封，做法同貪曾喺麥當勞道嘅物業一樣，當時周一鑊仲死撐自己合法。不過，紙包唔住火，屋宇署視察後即發勸喻信畀周一鑊，勒令佢一個月內拆走僭建物，但周一鑊至今仲未捨得拆，亦未見屋宇署署長區載佳有咩跟進行動，擺明就係有心放生周一鑊，反而對其他弱勢平民嘅僭建就窮追猛打，唔係有心包庇就係欺善怕惡。