政情：肥胡講減壓 倒醫管局米
醫管局主席胡定旭成個人圓碌碌，平時份人亦笑騎騎，睇嚟平時應該無乜壓力。「提升快樂指數基金」講座，尋晚搵佢大談減壓方法。點知出席嘅長者喺問答環節竟向肥胡大數本港牙醫服務不足，猛咁呻老人家剝牙要萬萬聲，搞到減壓座談會變咗醫管局申訴大會。不過，班長者鬧完肥胡分分鐘可以減壓，肥胡今鋪都算功德無量嘅。
講番個座談會，肥胡用咗唔少例子去解釋，減壓唔一定等同快樂，因為如果強行幫自己減壓，例如逼自己一星期內狂做運動出身汗，又或者要花幾萬蚊瘋狂購物等，都只係短暫忘憂，並唔能夠真係減壓，煩惱問題依然存在。
肥胡提到，做人最緊要知自己能力去到邊，強行去訂立一啲達唔到嘅指標，到最後可能會人財兩失，好似有次佢去行山，行到一半好腳痛，腳板底仲生咗好大個水泡，有醫生勸佢唔好再行，但佢堅持要行埋餘下路程。最後佢反省時先發現，萬一出現意外，自己好可能連命都冇埋，終於領悟到做事一定要量力而為，否則只會一無所有。佢嘅體會，放諸四海而皆準，唔知有無同佢嘅老友分享呢？