政情：工聯硬撼民記霸權
今年立法會選舉，兩大建制派政團工聯會（工記）同民建聯（民記）爆發內戰，期間不停掘對方選票鬥餐死，估唔到雙方嘅嫌隙延伸到區議會。東區區議會主席鍾樹根尋日正式辭去區議會主席職務，但主席空缺就再度引發雙方鬥爭。民記想要壟斷正、副主席兩個位，務求雄霸東區，但工記就覺得民記好霸道，誓要爭奪一席位，睇怕雙方嘅積怨要等「更高人士」出手先至可以擺平。
樹根自從當選立法會議員後，已經講明考慮辭任區議會主席一職，避免分身不暇。尋日佢正式向區議會遞信辭去主席之位，據聞主席寶座，民記早已決定傳畀該黨嘅區議會副主席黃建彬坐正，咁副主席個空缺又點算呢？正所謂做事留一線，日後好相見，按照不成文傳統，通常正副主席都由唔同政黨議員擔任，但今次民記恃住人多蝦人少，聯同友好議員，投票已過晒半數，自然唔使理工記要求，霸晒正、副主席兩個位。
其他黨派亦不滿太霸道
雖然工記喺東區已經係第二大勢力，但到依家都只得七位區議員，好難同民記硬撼，所以佢哋已經諗住拉攏自由黨、新民黨、甚至泛民主派議員，希望增加叫價能力，奈何加埋其他政黨同獨立議員，都唔夠民記多票。工記被民記踩到上心口，班兄弟都好唔舒服，於是諗到一條絕招，就係趁委員會開會時拉大隊離場抗議，寧願流會都唔畀民記專美。據聞唔止工記不滿，其他黨派都好不滿，資深區議員林翠蓮仲講明會落場爭主席添！
樹根尋日承認，工記最近已經先後兩次開會時拉隊離場，令到區議會運作受阻，佢覺得工記咁做法，民記亦唔會妥協，一定會爭到最後。佢仲話，工記喺立法會選舉時都冇幫民記，點解民記要喺區議會層面禮讓工記呢？其實依家工記喺東區區議會都有個身兼立法會勞工界議員郭偉強，背後仲有個扎根東區嘅王國興，所以工記想撈番個主席位亦無可厚非，況且上幾屆主席個位都係由獨立嘅丁毓珠擔任，只係珠姐退休，民記冷手執個熱煎堆啫！