中環出更：黃偉雄開洗腎中心助人
專業及資深行政人員協會副會長黃偉雄（Addy）向來熱心公益，早前佢牽頭喺灣仔成立一間洗腎中心，以低廉價錢為腎衰竭患者提供洗腎服務。咁熱心，唔少人都誤會Addy有腎病，但Addy就笑言身體好健康，只係體恤病人之苦，因為佢見過有員工傾家蕩產為家人籌錢洗腎，深受感動。
出錢又出力
Addy擔任洗腎中心榮譽主席，出錢又出力。中心開張經費要成六百萬元，Addy就唔肯講出咗幾多錢，但強調多得各方善長合力，先籌到筆錢，嚟緊會繼續科水支持病友的「資助洗腎計劃」。咁善心，一對仔女都現身打氣。
原來Addy大仔喺加國學成歸來，依家從事金融業。Addy話，兒子嚟緊要考取多個財務分析師資格，學吓嘢先。至於細女就喺倫敦著名時裝設計學院畢業，鍾意室內設計，佢話最緊要仔女開心喎，呢個爸爸認真開通。