「格仔人」愛去深圳打高爾夫球，因為深圳又近又方便，有時佢係真正去打波，但有時就夾雜其他活動。既然活動咁多，所以佢清晨五、六點就踏出家門出車，一去就成日，到夜晚深宵至返歸，真係「辛苦晒」，至於佢老婆知唔知佢另有活動，就真係得佢兩公婆至知嘞。
一行多用 出門唔好嘥
其實呢單料一早廣泛流傳，因為「格仔人」喺一次特別原因下，被迫要同相熟嘅人講呢件事。至於點解要有呢個特別原因呢，就容許我賣吓關子啦。其實「格仔人」無論係搵老友幫手叫「外賣」，定係「清晨打波」，絕招綜合嚟講只有一個，就係「一行多用」，每次有機會外出，就唔會浪費良機，一於搭單，做埋其他嘢。