前天文台台長林超英因為幫過特首梁振英（CY）撰寫環保政綱，競選期間又曾經為CY站台，被視為「梁粉」一員都好理所當然。不過，林超英就好似好介意人哋叫佢「梁粉」咁，尋日仲同「梁粉」劃清界線，話自己從來都唔係「梁粉」、就連「粉絲」、「米粉」、「河粉」都唔係！佢重申自己係一個有獨立思考嘅獨立個體，絕對唔會對任何一個人「癡迷」喎！
話說前排有網民質疑林超英唔支持小班教學，反而建議減班，但CY政綱講好會搞小班教學，明寸林超英身為「梁粉」都唔熟書。林超英一聽到「梁粉」就即刻反擊，強調自己從來只係「尊敬」CY有心為香港服務，但唔等於對CY施政盲目支持。林超英又重申，自己絕對唔會對任何一個人「癡迷」，事關佢係一個獨立個體。
林超英仲叫大家凡事都要講道理，作出評論前亦要多方面考慮，一句講晒要「是其是、非其非」啦。林超英脫離「梁粉」行列之際，仍不改「梁粉」口脗，唔知呢啲係咪叫藕斷絲連呢？不過既然林超英咁唔鍾意「梁粉」呢個名，大家就唔好再叫喇，下次見叫佢做「尊敬梁振英的人」咪算囉！