政情：心情跌至低點立會令高永文好抑鬱
都話加入政府等同入咗熱廚房，政務司司長林鄭月娥都講過，現屆政府令佢感到度日如年，原來食物及衞生局局長高永文都有少少抑鬱，每星期出席完立法會全體會議，心情仲會跌至低點添。
平時喺立法會畀人問到怕怕嘅高永文尋日出席一個全港抗抑鬱活動，仲做咗個心理測驗去測試抑鬱指數，發現佢都有少少抑鬱。佢話每朝起身第一件事就係睇吓有無人喺報紙上鬧佢，而逢星期三去完立法會後，佢嘅心情都會跌至低點。佢又話，社民連議員梁國雄（長毛）喺財委會不斷拉布，雖然呢個議題同佢無關，但佢都要對住電視機跟進情況，搞到連佢都辛苦埋一份，搞到放工後要暴飲暴食麻醉自己。
有份出席活動嘅民建聯葛珮帆（EQ）話自己興趣多多，所以絕少出現抑鬱情況，不過佢話近排長毛成日喺開會時講無聊嘢，又要逼佢哋坐喺會議廳內不斷撳鐘，搞到佢精神疲倦。佢又趁機話只要長毛放棄拉布，所有議員嘅抑鬱徵狀將會迅速消失。工黨張國柱就猛呻，依家開會通常會開到凌晨十二點，返屋企瞓幾個鐘後又要起身做嘢，所以要透過睇書同去旅行「抗抑鬱」。