政情：人聲淹沒琴音郎朗商場獻技逼滿人
要將古典音樂帶到群眾當中，認真唔容易。鋼琴王子郎朗尋日喺一間商場獻技，彈奏兩首蕭邦名曲兼舉行佢嘅新鋼琴大碟簽名會。可惜星期日商場人流太多，加上郎朗嘅魅力逼人，搞到場面混亂又嘈吵，悅耳嘅鋼琴聲終被場內人聲淹沒，真係大嘥到極。好在見慣大場面嘅郎朗表現專業，冇因為咁而影響表現。
尋日活動上，大會安排咗兩位郎朗嘅小粉絲上台彈琴，請郎朗畀啲意見。其中年約十歲嘅男童彈得特別出色，郎朗毫不吝嗇佢嘅讚美，仲豎起手指公話，喺商場咁嘅環境都彈得咁好，確係難得。佢坦言，喺商場彈琴同演奏廳環境好唔同，有時佢自己喺商場嘅台上彈彈吓，都好似淨係聽到觀眾嘅對話咁。
郎朗演繹貝多芬嘅樂曲已經到達出神入化嘅階段，但原來佢話，蕭邦先係佢嘅啟蒙老師，事關佢自細已經開始彈奏蕭邦嘅樂曲，但成長之後，都好耐冇彈奏過。今次郎朗推出嘅新專輯，就收錄咗佢演繹蕭邦嘅曲目，佢話希望藉住呢隻專輯，尋回兒時嘅美好回憶。