中環出更：廠商會越南考察過足癮
人仔狂升，港商喺內地設廠，愈見難撈。相反，進軍東南亞發展成新趨勢。廠商會班高層日前就帶隊考察越南，發掘投資商機。身為副會長兼香港品牌發展局主席陳淑玲同常務會董黃家和（Simon）負責帶隊，近四十人爭住報名，反應熱烈。
越南天氣清爽宜人，首日抵達當地，團友馬上展開考察，眾人先到河內，再趕往九十公里外的寧平省，小休片刻，馬上同當地領導及九十間企業代表打招呼，了解越南營商實況。香港人咁遠嚟到，越南政府出動高官接待，夜晚食飯時，一位投資規劃部部長更獻唱一曲娛賓，台風歌喉十足歌星，Simon笑言，睇怕香港高官以後都要勤練歌喉嘞。
偷閒比賽划船
考察第二日，團友又參觀越南工業園，走訪汽車零件廠、化肥廠及物流公司，忙咗一個上午，下午終於抖抖。眾人拉隊去長安旅遊區划船參觀溶洞。四十位團友變身大細路，分成十艘小艇喺湖上比賽，大叫過癮。