中環出更：李少光忙裏偷閒休息吓

咁老定，莫非佢已勝券在握？光哥淡定話：「今日休息吓。」言下之意，似乎信心十足。果然佢坐足成個晏晝唔捨得走。立法會議員張華峰喺第六場有馬出，佢同行會成員林健鋒、立法會議員梁君彥齊做啦啦隊，全程談笑風生，睇嚟呢場人大選舉，難佢唔到嘞。努力拉票嘅，仲有全國人大常委范徐麗泰。愛駒「自成一格」尋日出戰第五場，咁蹺，健康快車創會主席方黃吉雯帶一班內地朋友入場消遣吓，知道范太有馬出，紛紛話要押注支持。好彩「自成一格」最後跑第二，內地朋友統統有錢袋，皆大歡喜。

胡郭秀萍輸馬贏風度

合和主席胡應湘太太胡郭秀萍都唔執輸，派出駿馬「風力威猛」出戰第二場，老公同囝囝胡文新冒雨打氣，認真溫馨。胡公子喺賞馬圈見到媽咪隻馬時，興奮地拎部iPhone出嚟影低馬匹嘅雄姿。可惜「風力威猛」四甲不入。輸咗馬，胡太仍然氣定神閒，認真有大將風範。

愛駒「時時有機」一度帶頭，馬會大董陳南祿（右一）與太太（右二）睇得好肉緊，可惜隻馬後勁不繼輸咗。（嚴少阡攝）

胡郭秀萍（中）冒雨拖埋老公（左）及囝囝胡文新（右）入場，一家三口好齊心。

卓妮