風高物燥，防火要緊，尤其係嗰啲劏房、棺材房，除非唔出事，一出事隨時好大鑊o架。
呢，大角咀一個劏房單位前晚突然起火，半百住客倉皇摸黑逃生，場面熟口熟面，同上年大角咀另一場劏房大火幾乎一模一樣，唔同嘅係，上次有人喪生，今次好彩冇搞出人命咋，否則就大吉利是。
現場係大角咀一幢六層高唐樓，起火單位間成五間劏房，晚上突然起火，火勢猛烈，據稱一度傳出爆炸聲，樓上單位亦被波及，逾五十名住客從睡夢中驚醒，紛紛扶老攜幼狼狽逃生。警方調查後發現起火原因有可疑，暫列懷疑縱火案處理。
祝融無情，生命無價，劏房火海唔使再添冤魂，都算不幸中之大幸咯。不過，功夫茶想提醒一句，幸運之神唔係次次都會眷顧o架，劏房炸彈遍地開花，危機四伏，唔出事猶自可，一出事分分鐘一鑊熟。嗱，舊年花園街一場大火就奪走九條人命，而土瓜灣馬頭圍火災亦死傷枕藉，好多人依家仲心有餘悸o架。
唉，講來講去，都係前朝政府種下嘅禍根。曾蔭權爵士亂港七年，正正係劏房蓬勃發展嘅黃金七年，私樓貴到平民百姓諗都唔敢諗，公屋供應少到無殼蝸牛連揀凶宅嘅機會都無，搞到市民住籠屋有之，住棺材房有之，住豬欄雞寮亦有之，咁搞法，唔提心吊膽至奇喇。
所以話，要怪就怪貪曾同班政客，正常人見到火燭都識搵滅火筒救火啦，劏房炸彈存在多時，問題不單止無解決，反而愈演愈烈，身為救火隊嘅一眾政治權貴去咗邊呀？咁多年嚟做過乜嘢呀？公屋數目有無增加呀？土地供應有無增長呀？次次發生奪命慘劇都出來做大龍鳳，過後就煙消雲散影都無，十萬基層蟻民幾時至有機會脫離劏房噩夢呀？
劏房危機四伏，房屋官僚固然難辭其咎，但係班議會政客一樣抵鬧。市民住屋難問題一日比一日嚴重，號稱為民請命嘅立法會議員居然闊佬懶理，不聞不問，唔去諗計幫助市民，反而一味搞政治鬥爭，有破壞冇建設。呢，長者生活津貼撥款申請向立法會五度闖關，幾時通過仍然遙遙無期，政客鍾意玩拉布，劏房等民生問題又點會有人理吖。政客靠得住，豬乸會上樹，大家都係自求多福好過咯！
劏房火災又一宗，炸彈不除遲早爆。唔理房屋官僚又好，議會政客又好，唔該快快做啲正經事，萬一又搞到奪命火災，劏房火海再添冤魂，你哋一樣火燒後欄o架咋！