政情：鍾國斌鄙視「一次性時裝」
立法會紡織及製衣界鍾國斌（Felix）身為織造廠董事，對流行時裝當然頗有研究。佢話依家唔少大型時裝品牌鍾意設計啲即棄平價時裝，博啲衫着幾次就爛，之後再去買過晒啲新衫，咁就可以做多兩次生意薄利多銷。
Felix話，呢種銷售模式叫做disposable fashion（一次性時裝），佢對呢種經營模式非常之睇唔過眼，批評啲人雖然買完又買非常開心，但就對地球資源造成極大消耗。
佢話為咗對抗呢種趨勢，現時歐洲流行環保時裝，主要將一啲人哋唔要嘅舊衫重新設計，符合環保同慳錢嘅大原則。不過Felix話，呢種模式喺香港尚未成氣候，諗住遲啲等多啲香港人接受呢種服飾時，佢都會鼓勵旗下設計師採用多啲呢種設計。
之前有人講過今年消費意欲大減，唔少大型時裝店都提早減價促銷。
不過，經營出入口生意嘅Felix就有唔同見解，佢除咗睇好今年聖誕零售市場之餘，仲拍心口話明年出口會有一定程度上嘅增長，明顯睇好明年經濟。