政情：張炳良視察元朗仆損手
呢屆政府，問責局長全面微服出巡落區，了解唔同地區嘅問題同市民嘅生活。運輸及房屋局局長張炳良上個禮拜去元朗落區，估唔到佢直情親吻大地，成個人仆咗落地，仆損晒隻手。張炳良話依家日日沖涼隻手都要戴套保護，避免發炎。
話說喺上星期四，張炳良同班官員靜雞雞去元朗視察中轉房屋，點知行行吓失平衡，仆咗落石屎地行人路，情急下惟有用手做支撐，就係咁搞到成隻左手手掌損晒，要即時入醫院治理，仲要打埋破傷風針，醫生話最快要兩星期至好番。
張局長承認自己因為唔小心而「趴街」，下次會小心啲，又話好彩係傷左手，如果係整親右手，都唔知點食飯，分分鐘要食殘廢餐。為咗令記者明白佢點解仆親，佢仲即時嚟次案件重演，估唔到佢隻手傷晒，份人仲咁有幽默感，真係抵讚。不過話時話，只要佢下次通知埋記者去採訪，咁最多都係人逼人，斷估都唔會有空間畀局長仆親，咁就唔使受傷啦。