政情：林大輝開炮瞄準直選
前政務司司長唐英年「家臣」、現任廠商會立法會議員林大輝，近日經常向政府開炮，鬧完國民教育科同長者生活津貼計劃、又鬧埋曾經喺立法會拍檔過嘅「五散人」發展局局長陳茂波。鬧完又再鬧，有人質疑佢係咪為主子唐唐落選特首報復，事事針對特首梁振英政府。不過，據聞大輝有更大圖謀，就係四年後立法會選舉轉戰地區直選，落戶地點仲可能係今屆建制派成績極差嘅新界東添。
如果大家有留意，會發現最近大輝喺議會內都幾多意見，而且愈來愈高調，發言用字都幾重手。好似尋日立法會討論買家印花稅咁，佢就連珠炮發炮轟財經事務及庫務局喺未諮詢就出招係「自毀長城」、未見其利先見其弊，仲話呢招簡直係鹵莽同不顧後果喎。如果只聽佢講，其實都唔知佢為咩而鬧，只知道佢鬧緊人囉，最慘係局長陳家強尋日冇到，苦了副局長梁鳳儀。
新東公記認有緊密接觸
有政界中人分析，大輝經常向政府發炮，與其話同政府作對，倒不如想翻炒謝偉俊模式，期望由功能界別轉戰直選，一擊即中。有人透露，大輝參加直選嘅意志堅定，廠商會下屆如無意外都要搵定人接手立法會議席，否則到時臨急先物色合適人選就麻煩喇。
上述講法，可以話同新界東地區消息不謀而合，據講自從新界東地區政團公民力量（公記）九月立法會選舉落敗後，大輝繼續聯絡相關人士，表達希望同公記聯手打江山嘅意願，仲拍心口話若事成會攞筆錢資助公記嘅地區工作，之後更會每月注資，總之就會出錢出力壯大公記咁話。公記中人就話，依家講乜部署都言之尚早，但承認公記同大輝的確有緊密接觸喎。
願試任何服務市民崗位
雖然公記之前立法會選舉搵咗沙田區議員龐愛蘭（Scarlett）代表出選，但既然Scarlett已落選，改同大輝合作都並非冇可能。大輝尋日回應話，從來冇捐錢畀公記，亦冇諗住用公記個名出選；至於係咪轉戰直選，佢話任何崗位可以服務市民嘅，佢都願意嘗試喎。